Mere Dil Mere Musafir

Mere Dil Mere Musafir
Hua Phir Se Hukm Saadir
Ke Vatan Badar Hon Ham Tum
De Gali Gali Sadaain
Karain Rukh Nagar Nagar Ka
Ke Suraag Koi Paain
Kisi Yaar-E-Naamabar Ka
Har Ek Ajnabi Se Puchain
Jo Pata Tha Apne Ghar Ka
Sar-E-Ku-E-Naashanayaan
Hamain Din Se Raat Karna
Kabhi Is Se Baat Karna
Kabhi Us Se Baat Karna
Tumhain Kya Kahun Ke Kya Hai
Shab-E-Gam Buri Balaa Hai
Hamain Ye Bhi Tha Ganimat
Jo Koi Shumaar Hota
Hamain Kya Bura Tha Marna
Agar Ek Baar Hota

By Faiz Ahmed Faiz

Qurb Ke Na Wafa Ke Hote Hain

Qurb K Na Wafa K Hote Hain
Saray Jhagray Ana K Hote Hain

Baat Niyat Ki Sirf Hai Warna
Waqt Saray Dua K Hote Hain

Bhool Jate Hain, Mat Bura Kehna
Log Putlay Khata K Hote Hain

Wo Bazahir Jo Kuch Nahi Lagte
Un Se Rishtay Bala K Hote Hain

Wo Humara Hai Is Tarah Se Faiz
Jaisay Banday Khuda K Hote Hain

Ye Tabiat Hai To Khud Aazar Ban Jain

Sab Qatal Ho Ke Tere Muqabil Se Aae Hain

Kuch Ishq Kia Kuch Kaam Kia

Meray Humdum Meray Dost

Gar mujhay is ka yaqee.n ho
Meray humdum, meray dost
Gar mujhay is ka yaqee.n ho
Keh teray dil ki thakan
Teri aankhon ki udaasi, teray seenay ki jalan
Meri diljoyee, meray piyaar se mit jaaye gee
Gar mera harf-e-tasalli
Vo dava ho, jis se
Jee uthay phir tera ujra hua be noor dimaagh
Teri peshaani se dhul jaayen ye tazleel ke daagh
Teri beemaar javaani ko shifa mil jaaye..

Gar mujhay is ka yaqee.n ho
Meray humdum, meray dost
Roz-o-shab, shaam-o-seher
Main tujhay behlaata rahoon
Main tujhay geet sunaata rahoon
Halkay, sheeree.n..
Aabshaaron ke, bahaaron ke, chaman zaaron ke geet,
Aamad-e-subh ke, mehtaab ke, saiyyaaron ke geet,
Tujh se main husn-o-mohabbat ki hikaayaat kahoon,
Kesay maghroor haseenaaon ke barfaab se jism
Garm haathon ki haraarat mein pighal jaatay hain
Kesay aik chehray ke thehray huay maanoos nuqoosh
Dekhtay dekhtay yaklakht badal jaatay hain
Kis tarah aariz-e-mehboob ka shaffaaf biloar
Yak-bayak baada-e-ehmar se dehek jaata hai
Kesay gul-chee.n ke liye jhukti hai khud shaakh-e-gulaab
Kis tarah raat ka aivaan mehek jaata hai

Yoonhi gaata rahoon, gaata rahoon teri khaatir
Geet bunta rahoon, betha rahoon teri khaatir
Per meray geet teray dukh ka madaava he nahin
Naghma jarra nahin, moonis-o-ghamkhaar sahi
Geet nishtar to nahin, marham-e-aazaar sahi
Teray aazaar ka chaara nahin, nishtar ke siva
Aur yeh saffaak maseeha meray qabzay mein nahin
Is jahaa.n ke kisi zee-rooh ke qabzay mein nahin
Haan magar teray siva, teray siva, teray siva


Faiz Ahmed Faiz

chaNd roz aur meri jaan faqat chaNd hi roz...!!!

chaNd roz aur meri jaan faqat chaNd hi roz
zulm ki cHaauuN meN dam lene par majbuur haiN ham
aur kucH der sitam saih leN, taRap leN ro leN
apne ajdaad ki miiraas hai maazuur haiN ham
jism par qaid hai jazbaat pe zaNjiireN haiN
fikr mehbuus hai guftaar pe taaziireN haiN
aur apni himmat hai keh ham phir bhi jiye jaate haiN
zindagi keyaa kisi muflis ki qabaa hai jis meN
har ghaRi dard ke paiwaNd lage jaate haiN

lekin ab zulm ki meyaad ke din thoRe haiN
ik zaraa sabr keh fariyaad ke din thoRe haiN
arsaa-e-dahar ki jhulsi hui wiiraani meN
ham ko rehnaa hai par yuuN hi to nahiN rehnaa hai
ajnabi haathoN kaa benaam garaaN-baar sitam
aaj sehnaa hai hameshaa to nahiN sehnaa hai
yeh tere husn se lipTi hui aalaam ki gard
apni do rozaa jawaani ki shikastoN kaa shumaar
chaaNdani raatoN kaa bekaar dehaktaa huwaa dard
dil ki besuud taRap jism ki maayuus pukaar
chaNd roz aur meri jaan faqat chaNd hi roz
*********************************

Hum Parwarish e Loh o Qalam Karte Rahen Ge