Ghair Kya Jaaniye Kyon Mujhko Bura Kehte Hain

Ghair Kya Jaaniye Kyon Mujhko Bura Kehte Hain 
Aap Kehte Hain Jo Aisa To Baja Kehte Hain 

Waaqai Tere Iss Andaaz Ko Kya Kehte Hain 
Na Wafa Kehte Hain Jis Ko Na Jafa Kehte Hain 

Teri Soorat Nazar Aayee Teri Soorat Se Alag 
Husn Ko Ahl-E-Nazar Husn-Numa Kehte Hain 

Shikvaa-E-Hijr Karein Kis Dil Se 
Hum Khud Apne Ko Bhi Apne Se Juda Kehte Hain 

Teri Rudaad-E-Sitam Ka Hai Bayaan Naamumkin 
Faaydaa Kya Hai Magar Yoon Zara Kehte Hain 

Log Jo Kuch Bhi Kahein Teri Sitam-Koshii Ko 
Hum To In Baaton Ko Achchha Na Bura Kehte Hain 

Auron Ka Tajurba Jo Kuch Ho Magar Hum To "Firaq" 
Talkhi-E-Zeest Ko Jeene Ka Maza Kehte Hain.