Chehray Pe Mery Zulf Ko Bikhrao Kisi Din

Chehray Pe Mery Zulf Ko Bikhrao Kisi Din
Kyun Roz Garajtay Ho Baras Jao Kisi Din..

Perhon Ki Tarah Husn Ki Barish Mein Naha Loon
Baadal Ki Tarah Jhoom K Ghir Aao Kisi Din..

Khushboo Ki Tarah Guzro Mery Dil Ki Gali Se
Phoolon Ki Tarah Mujh Pe Bikher Jao Kisi Din..

Guzrain Jo Mery Ghar Se To Ruk Jayain Sitaray
Istarah Meri Zaat Ko Chamkao Kisi Din..

Main Apni Her Ik Saans Isi Raat Ko De Doon..!!
Sir Rakh K Mery Seenay Pe So Jao Kisi Din...