Mohabbat Akhrish Hai Kia..

Muhabat Aakhrish Hai Kia??

Main Shaair Hoon To Aksar Log Mujh Say Poochtey Hain
Is Haseen Israar K Baaray Mein
Bataain To Bhala Kya Hai?
Muhabat Aakhrish Hai Kya?
Wasi Main Hans Kay Kehta Hoon
Kisi Pyaase Ko Apne Hissey Ka Paani Pilaana Bhi
Muhabbat Hai
Bhanwar Mein Doobte Ko Saahiloon Tak Le Kay Jaana Bhi
Muhabbat Hai
Kisi K Waastay Nanhi Si Qurbani Muhabbat Hai
Kaheen Hum Raaz Saaray Khol Saktay Hon Magar Phir Bhi
Kisi Ki Be-Basi Ko Dekh Kar Khaamosh Reh Jaana
Muhabbat Hai
Ho Dil Mein Dard, Weeraani Magar Phir Bhi
Kisi K Waastay Jabran Hi Honton Par Hansi Laana
Zabardasti He Muskaana
Muhabbat Hai
Kaheen Baarish Mein Seh'me, Bheegte Billi Kay Bachey Ko
Zara Si Dair Ko Ghar Ley Kay Aana Bhi
Muhabbat Hai
Koi Chirya Jo Kamray Mein Bhatakti Aan Nikli Ho
To Us Chirya Ko
Pankhey Band Ker Kay Raasta Bahir Ka Dikhlana
Muhabbat Hai
Kisi Kay Zakhm Sehlaana
Kisi Rotey Huay Kay Dil Ko Behlaana
Muhabbat Hai
Kay Meetha Bol , Meethi Baat, Meethey Lafz, Sab Kya Hain?
Muhabbat Hai
Muhabbat Aik Hi Bas Aik He Insaan Ki Khatir
Magan Rehna
Hama Waqt Us Ki Batoon, Khushbowoon Mein Dolna Kab Hai?
Muhabbat Us Ki Zulf Kay Bul Kholna Kab Hai?
Muhabbat Kay Hazaaron Rang
Laakhon Ista'aarey Hain
Kisi Bhi Rang Mein Ho Yeh
Mujhay Apna Banaati Hai,,,,,,,,,
Yeh Mere Dil Ko Bhaati Hai.....